“Yazıçı Elçin deməli idi ki, əl çəkin bu adamdan, özünüzə siyasi şou düzəltməyin”

Azərbaycan xalq yazıçısı Əkrəm Əylislinin son günlər ölkədə əsas tənqid hədəfinə çevrilən “Daş yuxular” əsəri ilə bağlı bu gün Yazıçılar Birliyinə qapalı müzakirə keçirilib. Müzakirənin nəticəsi hələ mətbuata açıqlanmasa da, “Qafqazinfo”ya açıqlama verən yazıçı müzakirəyə qatılmadığını və onun iştirakı olmadan müzakirənin baş tutmasına münasibət bildirib:

“Müzakirədə iştirak etməmişəm. Yazıçılar Birliyinin mənim iştirakımla keçən son qurultayı səhv etmirəmsə, 1990-cı ildə olub. Həmin qurultayda mən, hələ seçki prosesi başlanmazdan əvvəl, birliyin katibi vəzifəsindən istefa verdiyimi qurultay iştirakçılarına bəyan etmişəm və ondan sonra Anarla vidalaşmaq üçün yalnız bircə dəfə Yazıçılar Birliyində olmuşam. Sonra 1992-ci ildə Yazıçılar Birliyinin üzvlüyündən azad olunmağım barədə birliyin katibliyinə ərizə ilə müraciət etmişəm. Ərizənin tam mətni belədir:“Get-gedə çürüməkdə olan və çürüdükcə daha tez iy verməyə başlayan Yazıçılar Birliyinin mənəvi məsuliyyətini üzərimdən götürmək məqsədilə birlik üzvlüyündən azad olunmağımı sizdən xahiş edirəm”. 

Ərizəni Anarın özünə göndərmişdim. Ola bilər ki, Anar onu katibliyə çıxarmağı lazım bilməyib. Ancaq mən o zamandan bəri bir dəfə də Yazıçılar Birliyinə getməmişəm, özümü bu birliyin üzvü saymamışam. Birliyin yeni üzvlük vəsiqəsinin hansı rəngdə olduğunu da bilmirəm. Sonralar mən Yazıçılar Birliyindəki mənəvi ab-havanın sovet dövründəkindən də süst və bəsit olduğunu mətbuatda dönə-dönə tənqid etmişəm. Burada aparılan “islahatların” ancaq bir məqsədə - indiki rəhbərliyin vəzifədə daha çox qalmasına xidmət etdiyini bildirmişəm. Ancaq hər hansı bir yeni kitabımın təqdimatının Yazıçılar Birliyində keçirilməsinin və hər hansı bir əsərimin burada müzakirə edilməsinin heç vaxt əleyhinə olmamışam. 

Lakin son 20 ildə Yazıçılar Birliyi tərəfindən mənə bir dəfə də bu barədə müraciət edilməyib. Buna görə də Yazıçılar Birliyinin mənim yeni əsərimə göstərdiyi bu diqqətin səmimiliyinə inanmıram. Tədbirin keçirilməsinin əleyhinə deyiləm. Lakin AYB-nin üzvü olmadığıma və son 20 ildə onun heç bir tədbirində iştirak etmədiyimə görə, müzakirənin hansı formatda keçiriləcəyindən asılı olmayaraq, özümün həmin müzakirədə iştirakıma lüzum görmürəm”.


Ə.Əylisli yazıçı Elçinin də “Daş yuxular” əsəri ilə bağlı tənqidi mövqeyinə münasibət bildirb: “Bunu deyən yazıçı Elçin deyil, dövlət adamı Elçindir. Əsərə bu cür münasibət kökündən yanlışdır. Yazıçı Elçin söz yox ki, deməli idi ki, əl çəkin bu adamdan, əsəri təhrif edib özünüzə siyasi şou düzəltməyin. Amma məmur Elçin bunu deyə bilməzdi. 37-nin nə demək olduğunu Elçin də bilir, Anar da bilir, mən də bilirəm”.

Açıqlamalarının birində ona və ailəsinə qarşı oluna biləcək hər hansı təzyiqlərdə bəyanat iştirakçılarının məsuliyyət daşıyacağını deyən yazıçı, bununla bağlı hər hansı bir tədbir görüb-görmədiyinə də münasibət açıqlayıb.

“Düşünmürəm ki, Azərbaycan camaatının özü tərəfindən mənim ailəmə qarşı təzyiq təşəbbüsü ola, olsa-olsa bunu yuxarılardan görürürəm. Əsəri yazmağıma peşman deyiləm, təhrif olunmağına peşmanam. Heç əsəri oxumayan, əsərdən xəbəri olmayanlar ağızlarına gələni deyirlər. Bayaq ANS-də “Günəbaxan” verilişində romanı müzakirə edirdilər, amma biri də əsəri oxumamaşdı. Onlara nə təlqin edirdilər, onu da deyirdilər. Aparıcı neytral mövqedə dayanmaq əvəzinə mənə qarşı nifrət yaradırdı”. /qafqazinfo.az/