Bakının Xətai rayonunda yerləşən Heydər Əliyev adına liseydə, yazıçı-dramaturq, “Ulduz” jurnalının baş redaktoru Elçin Hüseynbəyliilə görüş keçirilib.

Məlumata görə, liseyin 5-ci sinif şagirdlərinin və lisey rəhbərliyinin iştirak etdiyi tədbirdə yazıçının “Ədəbiyyat” dərsliyində yer almış “Firuzə qaşlı xəncər” hekayəsi əsas müzakirə mövzusu olub.

Hekayə Xocalı qətliamından bəhs edir. Əsərdə Zeynəb adlı bir gəlinin körpə balasını erməni qəsbkarlarından qoruması, qarlı meşələrdən keçərək öz yaxınlarına qovuşması təsvir olunur.

Liseyin direktoru Fikrət Xəlilov, direktor müavini İradə Əsgərova, dil-ədəbiyyat müəllimi Gülarə Həmidova, Xocalı qaçqını və dil-ədəbiyyat müəllimi Zülfüqar Qəribov çıxış edərək sözügedən hekayədən və yazıçının yaradıcılığından söhbət açıblar. Onlar əsərin rəvan təhkiyə üstündə qurulduğunu, zəngin ədəbi dilə malik olduğunu və Xocalı faciəsini tam gerçəkliyilə əks etdirdiyini deyiblər.

E.Hüseynbəyli ilə şagirdlər arasında gedən dialoqda yazıçının həyat və yaradıcılığı hərtərəfli işıqlandırılıb.

Söhbətin əsasını yazıçının uşaqlıq illəri, Qarabağ mövzusu təşkil edib.

Yazıçı bildirib ki, Qarabağ onun ən həssas və ağrılı yeridir, ona görə də bu mövzuya tez-tez müraciət edir.

Sonda yazıçı şagirdlərlə xatirə şəkli çəkdirib. /publika.az/