Hər şeyin bir adı

Hər şeyin  bir adı var

səndən sonra,

“Sənsizlik”

Anamın sözləri

ən böyük təsəllidi

səni unutmağa...

Bir də, hönkürtülərimi

asmışam qapı üstündən

gəlsən duyacaqsan.

Neyniyim?

Özümdən asılı deyil ki,

hələ də, dodaqlarım

uçuqlayır, öpüşlərünçün.

Şəhər

Şəhər çox dəyişib,

səndən sonra.

Uca binalar ucalıb

tıxaclı yollar çoxalıb.

“Ağ şəhər” layihəsi yaradıblar,

Şəhərin üzünü ağ edəcəklər.

Mən də dəyişmişəm,

əvəllkindən də arığam.

Ürəyim qocalıb,

gicgahıma dən düşüb

Heyf! məni də evləndirəcəklər.

Bu gün yenə də,

canımı qoymağa yer tapmıram.

S. Vurğun bağına getdim,

bir az heykəlinə tamaşa etdim.

Sonra, oturub bir az düşünmək istədim,

mümkün olmadı.

Fahişə qadınlar dümsüklədi böyürümü,

Qaçdım....

Gəl

Sənsiz,

doğum günümü

qeyd edirəm.

Ömrün bərəkəti

qaçıb qaragözlüm!

dəyəri yoxdu günlərin.

Məni ayrılıqlara

özün satdın.

Yoxsa, mən

belə qolu bağlı

qalmamışdım.

Gəl, ayrılığın

əlinə bir şey ver,

başını qatsın.

mən atamdan

siqaret çəkməyi

öyrənə bilmədim

heç vaxt.

Avanqard.net