“Milli Kitab Mükafatının münsiflər heyətində 3-4 adam var ki, onların mövqeyi ilə indidən razı deyiləm”.

Bu sözləri açıqlamasında Milli Kitab Mükafatının münsiflər heyətinin üzvü, xalq yazıçısı Çingiz Abdullayev deyib. Onun sözlərinə görə, münsiflər heyətində olan bəzi yazıçıların hərəkətləri və Azərbaycan xalqına münasibəti onun xoşuna gəlmir: “Həmin şəxslərin mövqeyi ilə bağlı narazılığım müsabiqəyə təqdim olunan kitablara görə deyil. Onlara iradlarımı iki dəfə demişəm”.

O, 2011-ci ildə Milli Kitab Mükafatı müsabiqəsində bir qrup münsiflər heyətinin istefası kimi analoji halın təkrarlanacağını istisna etməyib: “Münsiflər heyətindən getmək barədə fikirləşəcəyəm”.

Qeyd edək ki, Milli Kitab Mükafatı müsabiqəsinin bu ilki münsiflər heyətində “Daş yuxular” əsəri ilə cəmiyyətdə geniş ajiotaj yaratmış yazıçı Əkrəm Əylisli də var. Ç. Abdullayev konkret ad çəkməkdən imtina etsə də, Azərbaycan Yazıçılar Birliyinin üzvü olan Ç. Abdullayevin ona eyham vurması şübhəsizdir.

Münsiflər heyətində Ç.Abdullayevdən başqa Niyazi Mehdi, Rafiq Əliyev, Ayaz Salayev, Cəmil Həsənli, Şahbaz Xuduoğlu, Rüstəm İbrahimbəyov, Ramiz Fətəliyev, Elçin Şıxlı, Rəşad Məcid, Afaq Məsud, Nərgiz Cəlilova, Hamlet İsaxanlı, Mehriban Ələkbərzadə, Pərviz Cəbrayıl, Əkrəm Əylisli, Elxan Qaraqan, Qənirə Paşayeva və Sabir Rüstəmxanlı təmsil olunur.

Qeyd edək ki, 2011-ci ildə Ç.Abdullayevlə yanaşı R. Məcid də münsiflər heyətindən ayrılmışdı.

2013-cü il martın 1-də ekspertlər tərəfindən müəyyənləşdirilmiş 20 ən yaxşı əsərdən ibarət “longlist” (uzun siyahı), martın 15-də isə 10 əsərdən ibarət “shortlist” (qısa siyahı) müəyyənləşəcək və qiymətləndirilmə üçün Münsiflər Heyətinə təqdim olunacaq.

Rus dilində təqdim olunmuş əsərləri bu il rusdilli ekspertlər dəyərləndirəcək: Bella Zakirova və Vyaçeslav Sapunov.

İyun ayının 4-də isə mükafatın qalibləri elan olunacaq. Münsiflərin rəyləri internet səhifədə açıqlanacaq. Ötən il olduğu kimi, bu il də 1-ci yerin üç min, 2-ci yerin iki min, 3-cü yerin qalibi isə min manat pul mükafatı ilə təltif olunacaq. Qaliblərin kitabları həm kağız həm elektron formatda çap olunacaq.  Əlavə olaraq, ən yaxşı uşaq nağılının müəllifinə 300 manat, ən yaxşı gənc yazara 300 manat və ən yaxşı şeirə görə 300 manat məbləğində mükafat veriləcək.

Milli Kitab Mükafatı Azərbaycanın ədəbiyyat sahəsində ən böyük layihəsidir.  MKM 2009-cü ildə “Əli və Nino” Nəşriyyat evi tərəfindən təsis edilib və qısa bir müddət ərzində media və cəmiyyətdə çox geniş rezonans doğurub. Mükafatın əsas məqsədi ictimai diqqətin Azərbaycan ədəbiyyatına cəlb edilməsi, ədəbi əsərlərin üzə çıxarılması və stimullaşdırılması, Azərbaycan mədəniyyətinin və ədəbiyyatının sosial əhəmiyyətinin gücləndirilməsidir. /teleqraf.com/