Atatürk Mərkəzində Xalq yazıçısı İsa Muğannanın  romanlarının yenilənmiş nəşrlərinin təqdimat mərasimi keçirildi. “Hədəf” Nəşrlərinin “İdeal” silsiləsindən olan bu kitablar  yazıçının da iştirakı ilə oxuculara təqdim edildi.  

Tədbiri giriş sözü ilə açan Milli Məclisin mədəniyyət komitəsinin sədri Nizami Cəfərov İsa Muğannanı Azərbaycanın böyük mütəfəkkiri, dil və fikir ustası adlandırdı. Onun sözlərinə görə  İsa Muğannanın yaradıcılığı Azərbaycan ədəbiyyatının böyük epoxasını əhatə dir: “50 –ci illərdən başlayan bu yaradıcılıq 2012- ci illərdə də həmin keyfiyyətlə, həmin enerji ilə davam edir. Onun yazdığı əsərlər  bizim ədəbiyyatımızı, mədəniyyətimizi, düşüncəmizi zənginləşdirir. Onun bütün yaradıcılığını ilahidən, bizim çox zaman dərk etməyə çətinlik  çəkdiyimiz mənbələrdən gələn enerji əhatə edir”. 

O həmçinin qeyd etdi ki, İsa öz yaradıcılığına qiymət verməyi bacaran yazıçıdır: “Sözə yüksək qiymət verən yazıçı yazdıqlarını hər dəfə yenidən redaktə edir. Biz onu ancaq dünyanın böyük yazıçıları ilə müqayisə də bilərik”. 

Nəşr olunan kitabların redaktoru Şəmil Sadiq bildirdi ki, əsərlərin çapa hazırlanması və redaktəsi yazıçının rəsmi razılığı ilə baş tutub. Bu nəşrlər  milli-mənəvi dəyərlərimizin təbliğinə önəm verən nəşriyyatın   

oxuculara təqdim etdiyi daha bir maraqlı layihəsidir: “Həmçinin bu kitablar yazıçının 85 illiyinə, ədəbiyyatımızın təbliğinə bir töhfədir”.

Kitabların naşiri Müşfiq Xan İsa Muğannanın digər əsərlərinin  də yaxın vaxtlarda oxuculara təqdim ediləcəyini qeyd etdi: ““İdeal”, “Məşhər”, İsahəq, Musahəq”, “Qəbiristan”, “GurÜn” və “Cəhənnəm” əsərləri yaşlı və orta nəslə yaxşı tanışdır. Gənc nəslin bu kitabları mütaliə etməsi üçün biz onları  yeni formada, nəfis tərtibatda çap etdik.  Tezliklə yazıçının digər əsərləri də nəşr olunacaq. Bu siyahıya onun hələ işıq üzü görməyən “Həyatımdan səhifələr”, “Qırx kisə qızıl”, “Söz yarası”, “İlan dərəsi və ya Peyğəmbərin taleyi” adlı əsərləri daxildir”. 

 

Əsərlərində həyat eşqinin yüksək olduğunu bildirən Xalq yazıçısı Zəlimxan Yaqub “İsa Muğanna Azərbaycan dövlətini, millətini, obasını çox yaxşı tanıyır” deyə əlavə etdi.  “Nə yaxşı o 85 yaşında da yazıb, yaradır. İsa təkcə “İdeal” yaxud “Məşhər”i yazsaydı belə yenə də  Azərbaycan ədəbiyyatında əbədi yaşayardı”.   

 

Tədbirin sonunda çıxış edən İsa Muğanna ona və yaradıcılığına göstərdikləri diqqətə görə “Hədəf” Nəşrlərinə, qələm dostlarına, oxuculara təşəkkür etdi. /publika.az/