O QIZIN ARZULARI

Ölümcül yaralanıb
o qızın arzuları -
gündüzlər
hər gün
əri işə ötürməkdən,
uşağı məktəbə
yola salmaqdan,
gecələr
ər qoynunda gizlənməkdən.
Qolları yorulub
arzuları üstünə çəkməkdən.
Yenə üstü açıq qalıb -
soyuq dəyib bu gecə.
Nəfəs ala bilmir
qəlbində gizlətdiyi xəyanətdən.
Nə qədər tək yatmaq olar
Bir arzu, bir xəyalla?!.
Hər gün ev süpürür
uzun saçları ilə
qonağı olacaq deyə.
Hər gün yemək hazırlayır -
kirpiyində qor götürüb.
Vəfasızlıqdan o yanaömur qurtarır -

sərhəd kimi.
Özüylə döyüşdə
ölümcül yaralanıb
o qızın arzuları...


GÖZÜNÜ AÇ

Gözünü aç, bir baxım,
Bir də görüm özümü.

Baxışın mürgüləyir -
Vərəqləyim özümü.

Gözünü aç, bağlama,
Şeirim hardadı, bilim.
Qəlbim əsir düşübdü -
Gedib yolunda ölüm.

Gözlərini bir aç, bax,
Gözlərin nə haldadı?
Həsrət çoxdan çatıbdı -
Vüsal hələ yoldadı.

Göz yaşın quruyubmu?
Havam çatmır, boğuldum.
Ürəyində öləcəm -

Gözlərində doğuldum.



GİZLƏNMİŞƏM

Heç yerimi bilən yox
Mən qəmdə gizlənmişəm.
Hamı baxır üzünə,
Sinəndə gizlənmişəm.

Qəlbim köksündə ada,
Fikrim batıb dəryada.
Alışdım-yandım oda,
Sönəndə gizlənmişəm.

Qovruldum istisindən,
Kor oldum tüstüsündən.
Xəyalların köksündə n,
Enəndə gizlənmişəm.

Baxammadım üzünə,
Kədər çökdü gözümə,
Qayıdırdım özümə,
Dönəndə gizlənmişəm.

Köksündə qırma məni,
Sabahdan sorma məni,
Bu gün axtarma məni
Dünəndə izlənmişəm.


Avanqard.net