Əslində, 14 fevralın sevgililər günü kimi qeyd edilməsinin tarixi keşiş Valentindən çox-çox əvvəllərə gedib çıxır. 

Qədim Romada 14 fevral tarixi bütün Roma xalqı üçün xüsusi əhəmiyyət kəsb edirdi. Həmin gün Roma Tanrılarının kraliçası olan Junonun şərəfinə bayram elan olunurdu. Səhərisi gün isə Luperkalia bayramı başlayırdı. 

Bu bayram xalqın gənc kütləsi üçün böyük önəm daşıyırdı. Çünki bu gündə bütün ilboyu cəmiyyətin qayda-qanunlarının məngənəsində boğulan gənclərə heç bir buxova sığmadan azad sevişmək imkanı verilirdi. 

Valentini edam etdirən imperator II Kladius tarix qaynaqlarında bu hallara son qoymaq istəyən bir imerator kimi xarakterizə olunub. O, hətta orduda qulluq edən gənclərə evlənməyi müvəqqəti olaraq qadağan etmişdi.

O zamanlar Valentin Romada rahib idi. Onun ölümü barədə müxtəlif fərziyyələr var. Bunlardan ən geniş yayılmış olanı budur ki, həmin keşiş imperatorun qadağan etməsinə baxmayaraq, artıq keçmişdə qalmış o adəti bərpa edib və gizli şəkildə qızlarla oğlanları qeyri-qanuni olaraq görüşdürməkdə davam edirmiş.

 

İmperator onun bu hərəkətlərindən xəbər tutandan sonra keşişi zindana salır. Həmin il fevral ayının 14-də isə edam etdirir. 

Bəzi katoliklər iddia edirlər ki, Valentin xristianlığı təbliğ etdiyi üçün öldürülüb. Amma az öncə də qeyd etdiyimiz kimi, tarixdəki daha etibarlı qaynaqlarda Valentinin imperator II Kladius tərəfindən, bayaq yazdığım səbəblərə görə öldürüldüyü deyilir.

Şübhəsiz ki, bütün bunlar tarixi fərziyyələrdir. Əsas olan odur ki, insanlıq bu qədər müharibənin, qanın-qadanın, şərin şəbədənin içində belə öz duyğularının saflığını, təmizliyini qoruyub-saxlaya, yüzillərin o tayından bu çağacan daşıya bilir. 

Mən sevgiyə münasibətin bu qatını təbliğ etməyin, bu tərəfini göstərməyin tərəfindəyəm. 

Cümhuriyyətin süqutundan illər sonra öz müstəqilliyini bərpa edən xalq, ordusu olmayan bir ölkədə könüllü Qarabağa gedib şəhid olan insanlar, teatr yaradan ziyalılar, qız məktəbi açan milyonçular... Hamısı sevgiyə layiqdir!

Hərəsini sevməyə bircə gün ayırsaq, bütün ili Sevgililər Gününə çevirə bilərik. Bütün il Sevgililər Günü olarsa da, ömrümüz sevgiyə bürünər. 

Ömrünüz sevgiyə bürünsün! /teleqraf.com/