Rəbiqə Nazimqızı - Sürpriz
17.02.14

Rəfiqələrin görüşü, yəqin ki, olmuş hadisədir, amma məhz bu cür - sizə danışacağım hadisə heç olmaya da bilər. Əsas bu deyil, əsas odur ki, belə hadisələrin baş vermə ehtimalı var.
Keçək mətləbə. Tamaşa göstərirlər. İki qadın. Bir-birinə. Kafedə ikisindən başqa heç kəs yoxdur. Amma veclərinə də deyil. Daha doğrusu, bütün qüvvələrini işə salıb cani-dildən görmədikləri tamaşaçıların eşitməyəcəkləri alqışları barədə düşünürlər. Amma bu alqışların sahibi bir nəfər olmalıdır. Daha güclüsü.
Arada ofisiant gedib gəlir. Masada çay, mürəbbə...
Tufanqabağı səssizlik deyil, amma necəsə səssizlikdir, sürprizqabağı deyək.
Birinci replika yaşca nisbətən balaca olanından gəlir. Daha doğrusu, biz ilk bu replikanı eşidirik. Üzr istəyirəm, eşitmirik, təsəvvür edirik ki, eşitdik...
Sakit. Diqqətli olun, başladı. Bu arada nəzərə alın ki, ikinci qadın bütün söhbət boyu işvə ilə danışır, sanki mimika və jestlərini, səsini ətrafındakı görünməyən pərəstişkar ordusuna hesablayır. Birinci qadın sakit görünsə də, bir az əsəbidir, bununla belə qalib gələcəyini bilir. Ona görə də hücumda odur:
- Limonu stəkana at. Oynama. Ofisiant qızdı axı. Sən də mən bilən hələ…
- Kim deyir ki, biz yalnız kişilərin xoşuna gəlməliyik?
- Sən düzələn deyilsən.
- Elə sən də.
Pauza. Müqəddimə üçün yetər. Əslində, söhbət ekspromt deyil, onlar ikisi də rollarını evdə yüz dəfə məşq ediblər. Hər ikisi öz tərəf-müqabilinin replikalarından xəbərsiz olsa da, ehtiyat gediş üçün variantları həmişə var. Necə olsa, qadındırlar axı. Yenə hücumda yaşça kiçiyidir. Əslində, yaşın məsələyə dəxli yoxdur, sadəcə, biz onları necəsə fərqləndirməliyik, ya yox. Məsələn, saçlarının rənginə görə, geyim tərzlərinə əsasən. Amma bu vaxt və istedad tələb edir. Mənimsə vaxtım azdır. Ona görə sözü verirəm balacaya:
- Yaxşı, məni niyə çağırmısan?
- Səni görmək istəyirdim, darıxmışdım da. Çoxdandır görüşmürük (pauza gedir - müəl.). Hə, Arifənin nişanından sonra…
- Məndə günah yoxdu, vallah. O qız axmaq idi. Nəyinə yaraşırdı axı Samir onun? Əslində, mən istəmədən onlara yaxşılıq elədim. Onsuz da tec-gez ayrılacaqdılar.
- Hə, o biri rəfiqələrimiz kimi…
- Demək istəyirsən ki, hamısında günahkar mənəm? Canları çıxaydı, düz adamları seçəydilər. Qadın görəndə dodağı beş yerdən çatlayan tin uşaqlarını yox.
- Yaxşı, bəs Məleykə?
- Onun əriylə aramızda heç nə olmayıb. Məleykə özü uydururdu…
- Yaxşı e. Köhnə palan içi tökməyək.
Yox, imkanları olsa, səhərədək hesab çürüdərlər, amma bizim qadınlar bir az fərqli qadınlardır. Dalaşsalar da, axırda barışacaqlar. Özü də öpüşüb-görüşüb ağıllı-başlı ayrılacaqlar. Əvvəla, ona görə ki, qadındırlar, ikincisi, əsas səbəbi sonda biləcəksiniz, tələsməyin, üçüncüsü, mən əhvalata pozitiv son vermək istəyirəm. Fikrimcə, bu sizin üçün də xoş olar. Bizdə ölüm, ayrılıq, göz yaşı yoxdu. Bizim aktrisalarımız peşəkardırlar.
Amma deyəsən, qəhrəmanlarımın birinə simpatiyam çox olub axı, söhbətə elə hey o yön verir. Olmaz belə. Balansı gözləmək lazımdı. Haydı, işvəli gözəl, replikanı özün söylə:
- Hə. özümüzdən danışaq. Neynirsən, nə iş görürsən? Şəxsi həyatında nə var, nə yox?
- Maraqlı heç nə.
- Axı dedilər, səni qəşəng bir oğlanla bir yerdə görürlər tez-tez.
- Nədi, ola bilməz ki?
- Yox, niyə olmur ki, amma sən ciddi qızsan axı.
- Evlənməyə hazırlaşırıq, amma işlərimizi qaydaya salandan sonra. Toyda sən də olacaqsan.
- Yox, toyadək ürəyim dözməz, de görüm, hardan tanış olmusan, kimdi, nə iş görür?
Öz aramızdı, balans öz-özünə aradan qalxır. Bu balaca qız mənə aman vermir, elə böyüyə də:
- Niyə maraqlanırsan, xeyir ola?
- Dəlisən? Səninçün sevinirəm… Dayan e, yoxsa qorxursan?
- Qətiyyən.
- Yalan demə.
- Nədən qorxum ki?
- Səncə, mən çirkin qadınam?
- Yox, əksinə, çox gözəlsən.
Bax, bu yerdə balaca səmimidir, özü də qəti paxıllıq eləmir. Hərçənd, böyüyü buna inandırmaq çətindir. Özünüz dinləyin də:
- Sən inanmırsan ki, mənim başdan çıxara bilməcəyim kişi yoxdu yer üzündə?
- Şübhə eləmirəm. Amma bircə onu yox.
- Niyə? Kişi deyil?
- Bacarmazsan.
- Yaxşı da. Ürəyimi partlatma. De görüm kimdi. Tanıyıram?
- Çoxdan.
- Doğrudaaan? Kimdi? Yaraşıqlıdı?
- Olduqca.
- Ağıllıdır?
- Çooox.
Böyük bir az da yaxına gəlir, yox, məqsədi rəfiqəsinin sevgiisini ələ keçirmək-filan deyil, bu dəqiqə onu ciddidən də yalnız maraq idarə edir. Hə, özü də tələsir deyə, sözü verək ona:
- Maraqdan öləcəm indi. Səməd ola bilməz, Məcid də deyil. Sənin xoşuna gələcək kim var axı?
- Ağlına da gəlməz.
- Mərc gələk, üçcə günə ayaqlarıma düşüb yalvaracaq?
- Uduzarsan.
- Mənim uduzduğum olmayıb hələ.
- Bu dəfə yox.
- Niyə axı e? Kimdi ki bu məğlubedilməz?
- Qardaşın.
Bu yerdə qadınların üzünü iri planda göz önünə gətirmənizi məsləhət görmürəm, çünki bilirəm ki, onsuz da elə belə edəcəksiniz, başqa variantınız yoxdur. Ona görə də sizin təsəvvür etməyəcəyiniz şəkildə tamamlayıram əhvalatı: "Düz on iki saniyədən pərdənin o üzündə - yəni mətndə belə bu məqamda üzünü görə bilmədiyimiz qadınların şaqqanaq çəkib güldüklərini eşidə bilərdiniz - əgər hər şey mənim danışdığım kimi olubsa və əlbəttə ki, siz həmin kafenin qapısını açıb təsadüfən içəri girmisinizsə...
Belə də ki, mən sizə öz bildiyim variantımı danışdım, inanmasanız, öz variantınızı uydura bilərsiniz, əmin olun ki, heç kəsin xətrinə dəyməyəcək. Dəysə də, bilməyəcəksiniz. Çünki nə o qadınları tanıyırsınız, nə də məni...

Avanqard.net

Yenililklər
10.02.24
Öz nəğməmlə tək qalmışam indi mən - Höte
08.02.24
Gülnar Səmanın “Sözümüz sözdür-2” kitabı “GlobeEdit” nəşriyyatında çap olunub
01.02.24
Rus poeziyasının Gümüş dövrü - Seçmə şeirlər
01.02.24
Rəşad Səfər - Çığıranlar və çığırmayanlar
29.01.24
“İsveç nəsr antologiyası” ilk dəfə Azərbaycan dilində
29.01.24
Küyülü Nəccari Səid - Olumla ölüm arasında
29.01.24
Qulu Ağsəs haqqında kitab işıq üzü görüb
27.01.24
Natəvana "yaxılan" qara və qırmızı boyalar - Fərid Hüseyn yazır
25.01.24
Mahir N. Qarayev - Qara maskalı qatil
25.01.24
Tanınmış alim Paşa Kərimov vəfat edib
25.01.24
Fərid Hüseyn - Sözümüzü Allaha çatdırana vida
24.01.24
Vaqif Sultanlının “İnsan dənizi” romanı Təbrizdə yayınlandı
16.01.24
"Arşın mal alan" Ankara Dövlət Opera və Balet teatrında nümayiş olunub
16.01.24
Mahir N. Qarayev - Bir dəqiqəlik sükut, yaxud fikirli gördüyüm fikir adamı
16.01.24
Səfər Alışarlı - "Səs" romanı ustalıqla yazılmış əsərdir
16.01.24
Dünyaca məşhur roman Azərbaycan dilində - İlk dəfə
16.01.24
Səlim Babullaoğlu - Düma, Natəvan, xəncər, arxalıq və oyun
14.01.24
Ədəbiyyat İnstitutunda unudulmaz şair Nurəngiz Günə həsr olunmuş tədbir keçirilib
10.01.24
Bu boyda ömrü məhəbbətsiz necə yaşayasan? - Orxan Vəlinin Nahit xanıma məktubları haqqında - Fərid Hüseyn
10.01.24
Bolqarıstanda beynəlxalq festivalda ölkəmizi “Açar” bədii filmi təmsil edəcək
10.01.24
Tanınmış yazıçı, ədəbiyyatşünas Çingiz Hüseynov vəfat edib
10.01.24

"Dünya ədəbiyyatı" dərgisinin "Macarıstan" sayı və "Macar ədəbiyyatı" antologiyası nəşr olunub

26.12.23
Zərdüşt Əlizadə - Qəm-qüssə, kədər şairi
20.12.23
Fərid Hüseyn - Orxan Vəlinin Nahit xanıma məktubları haqqında
18.12.23
İki şair, iki şeir - Mahir N. Qarayev və Sesar Valyexo
18.12.23
Fərid Hüseyn  Bişkekdə Çingiz Aytmatova həsr olunan beynəlxalq forumda iştirak edib
13.12.23
Yun Fossenin Nobel mühazirəsi
11.12.23
2024-cü il üçün Türk dünyasının mədəniyyət paytaxtı Şuşadan Türkmənistanın Anev şəhərinə ötürülüb
11.12.23
Moskvada Əsgər Məmmədovun “Nar dastanı” adlı rəsm sərgisi açılı
11.12.23
Mixail Lermontov - Vəsiyyət    
11.12.23
Tutu Ağayeva - "Gözəgörünməzlər"in görünən və görünməyən tərəfləri
09.12.23
Səlim Babullaoğlu TÜRKSOY tərəfindən təltif olundu
09.12.23
Səlim Babullaoğlu - Allah və vətən aşiqi, böyük şair
09.12.23
Bakıda “Məhmət Akif Ərsoy. Seçmə şeirlər” kitabının təqdimatı olub
05.12.23
Dünya şöhrətli rumın şairəsi Ana Blandiana Bakıya gələcək
05.12.23
Kənan Hacının hekayəsi - Cin qapını bağlayır
05.12.23
Elçin Hüseynbəylinin hekayəsi - Dərs
05.12.23
Yevgeni Rezniçenko - Çağdaş rus poeziyası
30.11.23
Anar Məcidzadə - Canına dərd düşsün, ayrılıq salan
29.11.23
Həmin işıqlı günlər - Cavid Zeynallının yeni hekayəsi
©2012 Avanqard.net Muəllif hüquqları qorunur. Məlumat internet səhifələrində istifadə edildikdə müvafiq keçidin qoyulması mütləqdir.