"Qanun" nəşrlər evi yeni kiatablar nəşr edib. Aşağıda kitablar haqqında məlumatları təqdim edirik.

Q U S T A V  F L O B E R - SADƏLÖVH     

Görkəmli fransız yazıçısı Qustav Floberin bu po­ves­tin­də Felisite adlı sadə bir kəndli qızının mü­rəkkəb və kəş­məkəşli həyatı təsvir edilmişdir. Bu­rada son dərəcə sa­dəlövh bir qızın ilk nakam mə­həb­bətindən, onun xanım Obenin evində qul­luqçu kimi işləməsindən, xanıma son dərəcə sadiq olmasın­dan bəhs edilir. O, həm xanım Obenə, həm onun iki uşağına, həm öz bacısı oğluna, həm də kimsəsiz ağır xəstə Kolmiş babaya qarşı həddindən artıq qayğıkeş mün­asibət bəsləyir. Tək-tənha qaldığı zaman Lulu adlı bir tutuquşuna mehrini salır və bütün bu kimi hal­­larda çox səmimi və sadəlövhcəsinə davranır.

“Sadəlövh” povesti Qustav Floberin “Üç povest” adlı kitabına daxil olan əsərlərindən biridir.

Bakı, Qanun Nəşriyyatı, 2014,  140 səh., 1000 tiraj
İngiliscədən tərcümə: Cəlil Nağıyev
Redaktor: Natiq Səfərov

  


 
HƏMİD VƏLİYEV - MARK TVEN  JURNALİST KİMİ

Görkəmli ABŞ yazıçısı və jurnalisti Mark Tvenin jurnalistlik fəaliyyətindən bəhs edilən bu kitabda, onun jurnalistikaya dair bir neçə əsərinin ana dilimizə tərcüməsi təqdim edilir.

Kitab universitetlərin jurnalistika fakültələrinin, filologiya fakültələrinin və humanitar fakültələrin jurnalistika şöbələrinin tələbələri, magistr, dissertant və doktorantlar, xarici ölkələrin jurnalistikası tarixini tədris edən müəllimlər, habelə dünya jurnalistikası tarixi ilə maraqlananlar üçün nəzərdə tutulmuşdur.

Bakı, Qanun Nəşriyyatı, 2014, 76 səh., 500 tiraj
Elmi redaktor: Vüqar Zifər oğlu Əliyev
Rəyçi: Vaqif Arzumanlı




 
NİK KVARRİ - DON ÖLDÜ

“Don öldü” kitabı qanqsterlərin həyatından bəhs edən kəskin süjetli detektiv romanıdır.

Üç Don mafiyası qeyri-leqal biznesi nəzarətə götürüb daha da güclənməyə çalışırlar.
Donlar arasında bir qız üstündə başlayan müharibə Donların ikisinin həyatına son qoyur. Üstəlik bütün mafiya üzvləri qırılır.

Romanı hər kəs oxuya bilər, bütün yaş qrupları. Çox asan oxunur, təsirli yazı uslubu var.

Bakı, Qanun Nəşriyyatı, 2014,196 səhifə, 1000 tiraj
Tərcümə edən:     Şahbaz Xuduoğlu
Korrektor:            İradə Musalı
 



 
ANNA FRANK - GÜNDƏLİK   

Bu 13 yaşlı yəhudi qızının – Anna Frankın yazdığı gün­dəlikdir. Almaniyada doğulan Anna ailəsi ilə birgə alman faşistlərindən xilas olmaq məcburiyyətilə Niderlanda köçür. Bir neçə ailənin qal­dığı  sığınacaqda yaşadığı vahimə, qorxu dolu günlər onu  gündəlik yaz­mağa sövq edir. Öz ad günündən, yəni 12 iyun 1942-ci ildən etibarən 1 avqust 1944-cü ilədək gündəlik yazır. O, əvvəlcə buna əyləncə kimi yanaşır və başına gələnləri gündəlikdə  özündən uydurduğu Kitti adlı rəfiqəsi ilə gündəlikdə bölüşür. Lakin Niderlandın təhsil nazirinin radio ilə əhaliyə müraciətini dinlədikdən sonra bu işlə daha ciddi məşğul olur. Nazir insanları alman faşistlərinin işğalı ilə bağlı istənilən sənədi qoruyub saxlamağa çağırırdı.

Anna Frankın həyat tarixçəsi – gizlənməyə məcbur olan, sonrasa doğ­malarıyla birgə həbs düşərgəsinə düşüb, məhz yəhudi olduğuna görə orada məhv olan yəhudi qızının taleyidir. Diqqəti cəlb edən cəhətlərdən biri budur ki, Anna Frank özünün və yaxınlarının gələcəyi ilə bağlı daim qorxularla dolu olsa da, gündəliyi üçün narahat olmur, sanki onun bir möcüzə nəticəsində salamat qalacağını qabaqcadan bilir: ailəsinin həbsindən sonra sədaqətli dostlar son anda döşəmədə tökülüb qalmış kağızları xilas edirlər, bəlkə doğrudan da, tarix üçün lazım olan əlyazmalar yanmır?
Gündəlik kitab şəklində ilk dəfə 1947-ci ildə Niderlandda işıq üzü görür. 1952-ci ildə Amerika və İngiltərədə nəşr olunur. Hazırda gündəliyi dünyanın 70-dən çox ölkəsi öz dilində çap edib.
                                          
Bakı, Qanun Nəşriyyatı, 2014, 384 səh. 1000 tiraj
Ruscadan tərcümə: Vaqif Azəryar
Redaktor:  Nüşabə Hüseynli