Hədiyyə Şəfaqət: "Əlif Şafakın yerində olsaydım..." - MÜSAHİBƏ
30.12.14
“Yaponlar - "Aldanmaq istəmirsənsə, sual vermə" deyirlər.”
Salam əziz oxucu! “SUAL YAĞIŞI”nın 2014-cü il üçün son müsahibi duzlu-məzəli Şəki torpağında, gözəl, ziyali bir ailədə bu dünyaya göz açan kimi iddialı şəkildə “dünyaya xoş gəlmişəm” deyən Sevinc Məmmədovadır. Sevinc xanım ədəbi mühitdə Hədiyyə Şəfaqət imzası ilə tanınmaqdadır. Könül oxşayan şeirləri, riqqətə gətirən hekayələri və gündəlik həyatımıza güzgü tutan köşələri onun əsil kimliyindən xəbər verir. Hələlik layihəmizin qaydalarına uyğun olaraq qonağımızı müxtəlif şəxslərin yağdırdığı sual yağışında islatmağa hazırıq. Görək Hədiyyə xanım “quru” olmayanda kimə çevrilir?
- İlk sual Yaradıcılıq fakültəsinin təşkilatçılıq işlərində ən aktiv dinləyicisi Elşad Baratdan gəldi - Hədiyyə xanım, sual yağışına növbəti hədəf məni seçməməyinizə nə mane ola bilər və bu həqiqi yağış olsaydı kiminlə islanmaq istəyərdiniz?
- Hədiyyə Ş - Elşad bəy, eşitdim ilin ən yaxşı adamı seçilmisiniz? Hm… İkinci sual… “Təhlükəli suallar” silsiləsindən… (gülür)
- Deyirəm növbəti hədəf kimi Manaf bəyi seçən olsaydı, birinci özüm soruşardım görüm ilin-günün bu vaxtında niyə yetim olub? Yetim Qacar - Elə bir anınız olubmu ureyinizden “Kobud dost, sənin üçün çox darıxdım” statusunu yazmaq keçsin?
- Hədiyyə Ş – Elmlərdə barış mənzərəsi və gözlənilməz gül dəstəsi… “Kobud dost”… Yox, hələ hirsim soyumayıb. (gülür)
- Gül-çiçəyə tən Gültən Qədirli - Hədiyyə xanim, həyatin sizə ən gözəl hədiyyəsi nə olub?
- Hədiyyə Ş - Yəqin ki, Gültən xanım indiyəcən yaşadığım ömrü nəzərdə tutub soruşub. Həyatımın hədiyyələri çox olub. Mənə elə gəlir azad olmaq baxımından doğulduğum ailə, valideynlərim bir şans idi. Kiçik yaşlarımdan ailənin bərabərhüquqlu üzvü olmuşam. Atamın varlığı, anamın ruhu mənə Tanrının hədiyyəsi idi. Belə də, atamın hər ad günümdə ilk təbriki ən gözəl hədiyyəm idi. Bu il ilk dəfə o hədiyyə olmayacaq. Çox sadalaya bilərəm. Hədiyyələrim çox olub, hər birinin də öz dəyəri var, hamısı dəyərlidir. Həyat davam edir.
- Kədərli notlardan uzaqlaşıb Sevil-in İşıq-landırdığı suala baxaq, deyəcəkdim amma kədərin zarafatı olmur - Hədiyyə xanım həyatınızda elə bir hadisə olubmu ki, o hadisəni indi də xatırlayanda göz yaşlarınızı saxlaya bilməyəsiniz?
- Hədiyyə Ş - Mən ümumiyyətlə çox qırılqan, çox kövrək adamam. Adi şeydən göz yaşlarına boğula bilərəm. İtkilərim oldu... Ədalətsizliklər oldu… Çətin günlərim oldu… Səbrliydim… Amma göz yaşları… Bəli, Sevil xanım, elə bir hadisə olub. Hardasa 14 il əvvəl oğlum həyata gələndə bir gecə doğum evinə hansısa kənddən kasıb bir qadın gətirdilər. Halı çox pis idi və əməliyyat olunmalıydı. Qadının üç qız övladı vardı və öğlan gözləyirdi. Həkimlərin diliylə desək “Adamları” gec gəlib çatdılar və onlar gələndə vəziyyəti tamam pisləşmişdi. Əməliyyat eləmək mümkün olmadı və körpə doğularkən öldü. Gənc ananın əməliyyat edilməsi üçün həkimlərə yalvarıb - “Vallah anamgil imkanlıdı, mənə kömək edin, xəcalətinizdən çıxarlar”- deməsini heç, amma heç unutmadım. İndi də xatırlayarkən göz yaşlarına boğuluram. Bax, yenə də…
- Deyəsən Aynur Sultanova təhsil almağa yox, Hədiyyəşunas olmağa gəlir və növbəti araşdırmalarçün düz iki sual, bir sualfason yağdırıb – Hədiyyə xanım, fakültədə eşitdiyim qədəriylə Şəkilisiz və söhbət zamanı belə anladım ki, Şəkidə size anlayan daha azdır nəinki Bakıda… Sizi Şəkidən qoparıb Bakıya bağlayan ən əsas və həlledici nüans nə olub? Hədiyyə xanım və onun Allahı?
- Hədiyyə Ş - Əslində mən elə indi də Şəkidəyəm. Yəni, Bakıya bağlanmamışam. Ümumiyyətlə məndə bəlli bir məkana bağlılıq yoxdur, dərviş ruhluyam. İstənilən yerdə asanlıqla yaşaya bilərəm. Əyalətdə də ruhumuza uyğun insanlar olmamış deyil, sadəcə tanışmaq şansımız olmaya bilər. Elə Bakıda da çox deyilik, heç yerdə çox deyilik. Və mən Allaha, Tanrıya, İlahiyə, Yaradana, adını nə qoyursunuz qoyun, o qüvvəyə inanan adamam. Mənim Tanrım çox ədalətlidir. (gülümsəyir)
- Yaradıcılıq fakültəsinin yeni Sevinc-i Yunuslu xanımın sualından hədiyyə qoxusu gəlir - Hədiyyə, ən sevdiyin hədiyyə nədir?
- Hədiyyə Ş - Hədiyyə ilə bağlı ikinci sualdır. Başqa yöndən cavablandıracam bu dəfə. Kitab, çiçək. Əslində mən maddi anlamda qiymətli hədiyyələri heç sevmərəm. Ən gözəl hədiyyəmi hər il iş yerimizdəki qızlarımdan alıram, ad günümdə… Dostların diqqəti gözəl hədiyyədir. Övladlarım hansısa əlamətdar gündə öz əlləriylə kart hazırlayırlar, məktub yazırlar, gülümsəyirlər… Sərvər müəllim hər ad günümdə bir ağ qızılgül bağışlayır… Bir də gözəl bir hədiyyə almışam, çox sevdiyim bir dostum bağışlayıb, büllur fiqur, xüsusi anlamı var mənimçün…
- Xanım-ın sualına Aydın-lıq gətirin - Hədiyyə, insanları tanıyırsanmı, səncə hansı əlamətləri olan insan əsil insandır?
- Hədiyyə Ş – İnsanları qətiyyən tanımıram, amma bu məni narahat da eləmir, mənim tanımamın nə əhəmiyyəti var ki? Tanımadığımız milyonlarla insan var… Elə məni də tanımırlar. Həm mən “Heç səni belə bilməzdim” deyən biri deyiləm. Baxaram və gülümsəyərəm… Mən insanları sevərəm… Olduqları kimi… Əvəzində ancaq sevgi , ancaq sevgi, ancaq sevgi gördüm. Heç pis insanla qarşılaşmadım…
- Zamiq Mehdisoy demək istəyir ki, mən şeirlə dil açmışam - Hədiyyə xanım, sizcə şair anadan şair doğulur, ya bu da digər istedadlar kimi sonradan əldə olunur?
- Hədiyyə Ş - Sonradan əldə olunan vərdişdir, bilikdir, təcrübədir, sənətdir… İstedad sonradan aşkara çıxa bilər, ya da heç çıxmaz. Amma bilmək olmaz, anadan şair doğulurlar, yoxsa atanın belindən şair gəlirlər. Bəlkə də bir içim suda, bir udum havada var olur şair ruhu… Sonradan ataya, anaya köçür, doğulacaq körpəyə keçir. İndi siz tapın görüm şair nədən şair doğulur?
- Ramilə Q – Şairdən, şeirdən söz düşmüşkən şeirsiz keçinmək olar?
…Bir gün Olacaqsa əgər Sevməyəcəksən adam kimi... Çiçək olmağı sınayacaqsan, çiçək! Çiçəklər qarşılıq gözləmədən də Var olarlar... Su olmağı sınayacaqsan, su… Yağış damcılarını da basacaqsan bağrına yer tapılacaq sinəndə Daşları da Buz da tutacaq üzünü Lil də tutacaq dibini Amma axıb getməyində olacaqsan... Torpaq olmağı sınayacaqsan, torpaq! Yaşıllıqlar da göyərəcək köksündən, Yarğanlar da açılacaq... Bir də, Ağac olmağı bacaracaqsan... Gözləməyi də Durmağı da... Kölgə olmağı da sınayacaqsan Qurumağı da... İldırımları da çəkəcəksən özünə Yuva uçun gələn quşları da... Bir gün sevərsən əgər Adam kimi sevməyəcəksən... Günəş olmağı sınayacaqsan... Duman olmağı sınayacaqsan... Göy olmağı sınayacaqsan... Eləcə səbəbsiz "Niyələr"-siz, "Necə"-lərsiz Var olmağı sınayacaqsan...
Sonra sevəcəksən... Bir gün sevərsən Adam olmayacaqsan Dostum... Adamlar sevdimi Çiçək olur Su olur Torpaq olur Ağac olur Duman olur Günəş olur Yol olur Göy olur onsuz da... Mən sevgi deyirəm ha.... Sevgi!...
- Şükür sənə ay Allah! Şəhla bu dəfə nə dolma istəməyib, nə quzu kababı - Hədiyyə xanım, bildiyimiz kimi yazarlar müqəddəs “Söz”lə işləyirlər. Bu işdə də İlham “pərisi” onlara kömək edəndə şedevrlər yaranır. Necə düşünürsüz, sizcə nəyə görə bəzi yazarlarımız üzərində Pəri qanad gərmir?
- Hədiyyə Ş - İndi romantic-romantik cavab verəcəm ki, sözlə işləməzlər, sozlə… Nə bilim, nəsə edərlər. Qaldı Pərinin ayrı-seçkiliyinə, özündən soruşmaq lazımdır… (gülür)
- Dəniz Pənah həyatınızın devizini və missiyasını bilmək istəyir mənsə heç bilmirəm o, xanımdır yoxsa bəy - Əsərləriniz (şeirləriniz) təxəyyül məhsuludur yoxsa ilham pərilərinin pıçıltısı?
- Hədiyyə Ş - Həyatimin missiyasını, mənasını, niyə gəldiyimi, nəyə gəldiyimi, bir bilsəm… Devizim… “Hər şey yaxşılığa doğrudur” deyərəm daima… Və Dəniz xanıma minnətdaram, şeirlərimi qürurlandırdı. Başqa bir şeydir şeirlərim… İçimə çəkilmişliyimdəki duyğularımdır bəlkə də… Bəzən mənə elə gəlir ki, o şeirləri yazmıram, köçürürəm. Zatən olan bir şeyi görünər hala gətirirəm, oxunar hala gətirirəm… Gətirə bilsəm təbii ki…
- Tural Coşqun coşaraq soruşur - Hədiyyə xanım, qeup yoldaşı deyilik, dostluğumu niyə qəbul etmirsiz?
- Hədiyyə Ş - Dostluğunuzu qəbul elədim… Qrup yoldaşı olmağımız kömək elədi. (öz aramızdır, bu qıza gülüş yaraşır da)
- Bu gənc “Həə”, “Hədiyyə-Sevinc xanım dəyərli dost və öz qalaktikası olan insan formasında bir nurdur . Çox xahiş edirəm, cavab verəndə mümkün qədər səmimi, ətraflı təsvir edəsiz deyib mənim işimin yarısını yerinə yetirib. Yəni, heç kim sual verməsəydi də onun sualları müsahibəni tamamlaya bilərdi. İntiqam İsmayıl - 1) Sizcə iki adla yaşamaq həyatınızda nələrisə dəyişibmi və çətin deyil ki? 2) Məhşur aktyor Cim Kerrinin bir filmində olduğu kimi əgər Tanrı bir müddətlik məzuniyyətə çıxsa və siz o müddət ərzinde Tanrının bütün güc və bacarığına sahib Tanrıça olsaydınız müddət bitənədək nələr edərdiniz? 3) Ömür bitmədən bütün gecəni görməyi arzuladığınız yuxunu necə təsvir edərsiniz? 4) Keçmişə dönmək mümkün olsaydı hansı dövrə qayıdıb yaşamaq istərdiniz?
- Hədiyyə Ş - İntiqam bəy müsahibə içində müsahibə götürür, suallarını dinlədikcə məni bir az daha tanımaq istəyən insan görürəm… Sanki bir az da “Mən sizi başa düşürəm” - deyirmiş kimi… “Öz qalaktikası olan insan formasında nur”… İntiqam bəy bu sözləri hardan tapıb çıxarır görəsən? ))) 1) Adlarla bağlı məsələyə tamamilə adi yanaşıram… Ad tale deyil, əhəmiyyətli bir şey də deyil. Ən gözəl dostlarımın adını unutsam bir gün, inciməzlər məndən. Addır, bir-birimizdən fərqlənək, çağıranda cavab verə bilək deyədir. Çox asan, adi məsələdir. İnsan var ki, illərdir dostuq, hələ də həqiqi adını bilmirəm. Maraqlı da deyil… Ad onun haqqında nə məlum edəcək ki, mənə? İnsan var ki, illərdir dostuq harda yaşadığını, nə işlə uğraşdığını bilmirəm… Maraqlanmıram da… Yaşadığı yeri dəyişə bilər, işini dəyişə bilər… İnsan var ki, mənim adımın nə olmasının onun üçün əhəmiyyəti yoxdur… 2) Filmdə gördünüz də, nələr baş verdi, lazımdır sizə bu? (gülür) Yəqin ki, bütün müddət ərzində bu məzuniyyət tez bitsin deyə dua edərdim. Hər şey öz yerində qalsa yaxşıdır. 3) Çox az yuxu görən adamam. Amma bir yuxu gördümmü, mütləq xəbərdarlıq olduğunu bilərəm. Bu mənə anamdan keçmədir və bircə dəfə də yanılmadım. Nə olacağını dəqiqliklə bilməsəm də, xəbərin, hadisənin, xəbərin yaxşı və ya pis olacağını dəqiqliklə bilirəm. Son gecəmdə isə… Anamı görmək istərəm… Nə isə, bu qalsın… 4) Olmayacaq şeylər üzərinə hökm vermək, planlar qurmaq… Amma nə deyirəm ki, xəyala dalmaq da olar, arabir… Hansı dövrə dönüb yaşamaq istərdim? Öz həyatımda baş verən qırıq-qırıq yaşantılar var ki, oları təkrar yaşamaq istədiyim. “Nə yaxşı oldu” dediyim… Amma onları hər dəfəsində yaşaya bilirəm. Ümumiyyətlə bilirsinizmi, mənim üçün zaman və məkan anlayışı absurd bir şeydir. Həyatı göz önünə sərsək, var insan ömrü, var ağac ömrü, var çiçək ömrü, lap elə bir günlük kəpənək ömrü… Amma bircə dəfə də olsa hər biri kimi yaşayacağıq. İndi desəm ki, qayıdıb ağac olduğum dövrü yaşamaq istəyirəm… Bilmirəm, doğrusu…
- Ulduz kimi parlaq, gözəllər-gözəli Zeynalova soruşur – Hədiyyə xanım, yazdıqınız hekayələrdə özünüzü qörürsünüzmü?
- Hədiyyə Ş - Ulduz xanım diqqətli oxucudur. Hekayələrimin bir ünvanı, bir mənası, bir adı var-İNSAN. Hekayələrimin qəhrəmanlarında, ya da elə qəhrəmansız ötüşək, iştirakçılarında, daha dəqiqi, insanlarında indiyədək dəqiq mən olmamışam. Ən azından mənə elə gəlir, bəlkə də varam. Bəlkə də olacam… Amma çox güman ki, o mətnlərə məndən bir şeylər ötürülüb də…
- Zamiq Mehdisoy “aaaa mən elə bilirdim təkcə qəzəl yazırsız” deyib təəcübləndi - Hədiyyə xanım, siz hekayə də yazırsız?
- Hədiyyə Ş - Bilməmək eyib deyil. Elə şeylər var ki, heç öyrənməmək də eyb deyil. Siz yenə elə bilin ki, mən qəzəlxanam. (gülür)
- Etibar Sülüymanov dəqiq əmindir ki, o, Yazar-dır və sualı da poetic ünvanlayıb - Ömürdən, həyatdan keçsə də illər, Yaşadım mən yadımdakı günlərlə. Həyatınızdakı o gün hansıdır?
- Hədiyyə Ş - Bəli, elə gün yaşadım. Müqəddəs gün! Səhəriylə axşamı ölümlə həyat arasında dəyişdi.
- Rəhim Əliyev demişkən, İsrafilqızı Gülnarə maraqlı sual verib - Hədiyyə Şəfaqət özünü ədəbiyyatda tapıb ya ədəbiyyatı özündə?
- Hədiyyə Ş - Gülü, əzizim, nə onu, nə bunu itirmədiyimə görə… (gülür)
- Ramilə Q – Pah atoonan, hər yerdə itirməli nəsə var?
- Hədiyyə Ş - Heç nə itmir, mənə güvənin. (gülümsəyir)
- Səfurə Həsanzadə sizi Elif Şafaka bənzədirmiş - Nə zamansa Hədiyyə xanım "Ted Talks"-da öz ədəbi mühazirələrindən, həyat hekayəsindəki uğurlarından danışa bilərmi?
- Hədiyyə Ş – Elif Şafak ən çox oxunan yazarlardan biridir hazırda. Hərçənd ki, ona çox da ciddi yanaşmırlar. Hər halda oxucusu var. Uğurlu yazar sayıla bilər. Əminəm ki, danışılacaq, bölüşüləcək hekayətləri də var. Bəlkə də Əlif Şafakın yerində olsaydım daha çox uğursuzluqlardan danışardım. Kömək edəcəksə... Əslində hər ikisi nisbi məsələdir-uğur da, uğursuzluq da… Mən ümumiyyətlə söhbətcil adam deyiləm. Kiməsə nəsə anlatmağa ehtiyacım olanda özümə məktub yazaram amma kimlərsə mənə nələrsə anladacaqsa dinləməyi sevərəm. Mənim elə bir imkanım olduğunda daha çox insan hekayələri dinləmək istərəm. İnsanı yazmaq istədiyim kimi…
- Çinarə Nüsrətbəyli Nəsimini görüşünüzə gətirib - Hədiyyə xanım, "Məndə sığar iki cahan, mən bu cahana sığmazam" misraları sizdə hansı təəssüratları yaradır?
- Hədiyyə Ş - Özündən keçmişlik, tamamilə bir parçası olduğu haqqa qovuşmuşluq səadəti… Amma o ruh susmalıydı, niyə bunu dilləndirmiş ki? O yerdə sükut var, sükut…
- Ülkər Piriyevanın verdiyi sualın məzmun və formasında heç bir dəyişiklik eləmədən ünvanlayıram – Deyirlər Hədiyyə xanım, keçmiş mühafisəkardır. Bəs gələcək?
- Hədiyyə Ş - Hər bir gələcək daha sonrakı gələcək üçün keçmişdir. Zaman yoxdur. Mühafizəkarlığı var edən, ona həyat verən onu tanımaqdır. Siz azadsınızsa məsələ bitmişdir. Keçmiş üçün də, gələcək üçün də…
- “Bir damcı ürək” Əfsanəmiz də ad davası çəkir, deyir oxucular onun öz adını bilməlidir, məhkəməyə verəjəm - Bildiyim qədərilə adınız Sevincdir. Nə üçün Hədiyyə adı ilə yazırsız?
- Hədiyyə Ş - Sevinc sənəddə qeyd edilən adımdır, Hədiyyə isə ilk çağırışdan tanıdığım… Həyatımı xilas edən həkimin şərəfinə Hədiyyə deyə çağrılmışam. Sevinc isə məndən əvvəl doğulub ölən böyük bacımın adıdır, anama təsəlli olsun deyə mənə qoyulub. Heç kim biləmməz ki, mən oyam, ya da bu… Amma yenə deyirəm, ad məsələsinə adi yanaşıram…
- Ramilə Q – O, və bu Hədiyyə xanımı nə təəccübləndirə bilər?
- Hədiyyə Ş - Hər şey var ola bildiyi üçün vardır, hər şeyi var edən vardır. USTAYA heyrətlənərəm amma təəccüblənmərəm.
- Ramilə Q – USTA kimdir?
- Hədiyyə Ş – TANRI.
- İctimai televiziyanın əməkdaşı Şöhrət Eyvazov oxuduğu fəlsəfə kitablarından ayrıla bilmir - Yaponlar - "Aldanmaq istəmirsənsə, sual vermə" deyirlər. Bəs Hədiyyə xanım yalan cavab ehtimalının böyük olduğu sualları nə vaxt və kimə verib?
- Hədiyyə Ş - Təsadüfən mən yapon ola bilərəmmi? (gülür) Şöhrət bəy tanıdığım qədəriylə bilir kimdən nə soruşmaq lazımdır. Həqiqətən də, sual verən insan deyiləm. Məsələn; “Necə olacaq?”-deyə… Necə olacağını kim deyə bilər ki? Doğruluğu ancaq ehtimal oluna bilən cavabların sualları ta başından verilməsə gözəldir. Belə adi gündəlik suallar ola bilər… Bacardıqca düzgün cavablandırmağın tərəfdarıyam, ya da susmağın… Və hər doğru cavab da hər adama deyilməz.
- Şəhanə Sadıqova sizi az bir müddətdə tanıdığına baxmayaraq kübarlığınıza heyran olub və vurğulayır ki, sizin fikriniz onun üçün çox maraqlıdır – Əsil insan istəyərək ya da istəməyərək etdiyi pisliklərdən gec və ya tez peşiman olur. Bəs Hədiyyə xanım etdiyi yaxşılıqdan peşiman olubmu?
- Hədiyyə Ş - Xoş sözləriniz üçün minnətdaram. İlk əvvəl deyim ki, “yaxşılıq etmək” ifadəsiylə özümüzdən yuxarı görünərək özündənrazılığımızı təmin edirik. Biz bir şey etmərik, qəlbimiz etdirər. Yaxşılıq yardımlaşmadır. Həm nə bilirik ki, biz o “yaxşılıq” dediyimizi etməsəydik başqa biri ondan daha gözəlini etməyəcəkdi? Biz nə bilirik ki, bu gün “yaxşılıq” deyib etdiyimiz hər nəsə sabah pis bir başlanğıca çevrilməyəcək? “Yaxşılıq” dediyimiz yardımlaşmasa, mən etdim deyə çox rahat oluram. Dolayısıyla özüm üçün etmiş oluram. Cavabım “Xeyir” olacaq. Amma bu həm də sadəcə mənim deyil, qarşıdakının zənginliyidir. Heç pis insan çıxmadı ki, qarşıma…
- Hörmət etdiyimiz insanlardan olan, əyalətdə yaşayıb şeirləri ilə bütün Bakını dolaşan və heç özü də bilmədən mənim üçün gözəl bir başlanğıca imza atan Aqşin Dadaşoğlu - Mənə görə hər kəsin öz düşüncəsi boyda Tanrısı var. Tanrıya inanırsınızmı?
- Hədiyyə Ş - Tanrıyla bağlı sualların olacağını bilirdim. Tanrının mənim inamıma ehtiyacı olmasa da cavabım “Əlbəttə” olacaq. Tanri düşüncəmiz boyda deyil, Tanrı heç nə boyda deyil. Biz sadəcə özümüz boyda anlarıq Tanrını. Tanrını özümüzdən duyub anladıqmı, sevgi vardır demək… Oşonun dediyi kimi-“Var oluş coşğu içindədir”.
- Ramilə Q – Sonlardan xoşlanmasam da, söhbətimizin sonuna yaxınlaşırıq. Unutmağa kimsə varmı və ya unutqanlıqla aranız necədir?
- Özümə çox unutqan deməzdim, amma çox yaddaşsız adamam. Göz yaddaşım ümumiyyətlə zəifdir, çox güman ki diqqətsizəm. Uzun müddət müalicə almağımın nəticəsində yaddaşımda problemlər də yaranıb amma əsla unutmayacağım bir şeylər əlbəttə vardır. Onlar da məncə yaddaşımda deyil, ruhumda qorunur. Unutqanlığımın ziyanını bilirsiniz ən çox harda çəkirəm, kitablarımı aparırlar ki, oxusunlar, qaytarmırlar, fikirləşə fikirləşə qalıram ki, görəsən filan kitabı kimə verdim? Sonrada özümə təsəlli verirəm ki, "çiçək oğurluğu, ürək oğurluğu, bir də kitab oğurluğu halaldır". (gülür)
- Sual verənlər bir yana, mən bu söhbətdən çox böyük zövq aldım. Hədiyyə xanım, bu anlarçün sizə təşəkkür edirəm və inşAllah bütün suallarınızın cavabını ən ədalətli şəkildə Allahdan alasınız. Amin!
- Hədiyyə Ş - Amma mən sual verən insan deyiləm. (gülür)
- Ramilə Q- Gülümsəyin Hədiyyə xanım, mən unutqanam. Məqam gəlib çatdı layihəmizin qaydalarına uyğun olaraq ən maraqlı sual sahibini təyin və növbətu sual hədəfimizi təqdim edin.
- Sual ünvanlayan hər kəsə təşəkkür edirəm. Cavablandırdım… Ən yaxşı sualın müəllifini fərqləndirmək istəmirəm. Hər bir sual özlüyündə gözəldi. Həmçinin növbəti müsahib kim olacaq, onu da hələ düşünmədim. Çox qəribədir ki, yeni dinləyici dostlarımız daha fəaldılar. Qalibi bəlkə siz özünüz seçəsiniz? Ədalətsizlik etmək istəməzdim… Dostlarımız hansı kitab alacağıma qərar versinlər, sonra özləri müəyyənləşdirsinlər kitab kimin olacaq. Hədəf… Bəlkə elə Şəhla Aslan? Kitabı da təqdim edildi, bu aralar gündəmdədir, necə olsa sual-cavab havasındadır indi. Olsun!
- Ramilə Q – Vallah düzünü desəm mənim bu Yapon deyimindən çox xoşum gəldi amma bildiyim qədərilə Şöhrət müəllimin sizə kitab borcu var.
- Hədiyyə Ş – Əla, Şöhrət bəylə kitabları dəyişə də bilərik. (gülürük)
- Ramilə Q - O ki qaldı Şəhlaya, növbəti “SUAL YAĞIŞI”nda islanmağa əsil Aslan kimi hazırlaşacağına əminəm.
Yarı zarafat, yarı:Ramilə QARDAŞXANQIZI
|