Səbəblər heç də cəfəngiyyata oxşamır.
 
Bütün sahələr üzrə apardıqları araşdırmalar, sorğular, təhlillər və əldə etdikləri nəticələrlə hər zaman təəccübləndirməyi bacaran alimlər bu dəfə də ədəbiyyat dünyasını hədəfə aldı. “Bestseller” sözünün artıq dillər əzbəri olduğu son 20 ildə nəşr olunan kitablar arasında analizlər aparan elm adamları çox satılan kitabların sirrini açdıqlarını iddia edirlər. “ntcmsnbc”nin məlumatında bildirilir ki, Nyu-Yorkda yerləşən və sosial-mədəni sahələrdəki araşdırmaları ilə tanınan Sotni Bruk Universitetinin professor-tələbə araşdırma komandasının əldə etdiyi nəticəyə görə, klişe səhnələrdən və xəbərlərdən uzaq durmuş kitabların daha çox satılma imkanı yüksəkdir. Populyarlaşan, çox satılan kitablar üçün “statistik stilometriya” adlandırılan bir alqoritm də tərtib etmiş komanda bu tip kitabların xüsusiyyətlərini açıqlayıb. Bu alqoritmə uyğun gələn kitabların uğur qazanmasının 84% sığortalandığı iddia edilir.

İnternet kitabxanalardan nüfuzlu “Project Qutenberq”ə yüklənmiş kitabları götürərək incələyən alimlər nəşr olunan hər kitabın uğurunda maraqlılıq, orijinallıq, yazı üslubu və hekayənin gedişi kimi bir çox məlum ünsürlə yanaşı, şans məsələsinin də olduğuna diqqət çəkirlər.

Giriş cümlələri və ya adları “və”, “ancaq”, “amma” kimi bağlayıcılarla başlayan kitabların daha çox maraq cəlb etdiyini göstərən araşdırmaçılar ticari uğur əldə edən əsərlərin eyni zamanda sifət və isimlərlə zəngin olduğunu da iddia edirlər. Rəflərdə qalan kitablar daha çox fel və zərflərlə zəngin mətnləri olanlardır.

Oxucu tərəfindən maraqla qarşılanan kitablarda duyğusallıq, emosional keçidlər, səhnələr daha çoxdur. Araşdırmaçılar inkişaf etdirdikləri alqoritmi qeyri-bədii ədəbiyyat nümunələrindən poeziya nümunələrinə qədər tətbiq ediblər. Araşdırmanın təfərrüatları ilə maraqlananlar “Association of compulational Linguistics” dərgisi ilə tanış ola bilərlər - www.aclweb.org. /kaspi.az/