Mənsiz şəkil çəkdirmə

Mən səni sevə bilərdim,
Sevmirəm... guya sevmirəm.
Elə səndən danışıram
Ulduza, aya... Sevmirəm.

Əllərim darıxır biraz,
Əlimdən o yana yox.
Sakit danış ürəyimin içində,
Ürəyim oyanar, yox.

Hər gün gözlərimdəsən,
Gözlərimdən çəkil dəə.
Sənə bir söz də deyim,
Mənsiz şəkil çəkdirmə,
Pis düşürsən şəkildə.



Biz azadlığı filmlərdən tanıdıq

Dünya, heç olmasa
Bircə gün yum gözünü,
Bağla əllərinlə qulaqlarını.
Qışqıra-qışqıra deyim ki:
“ Mən Onu Sevirəm ”

Biz azadlığı
Filmlərdən tanıdıq.
Uzaq tanışdı bizə.
Xəyallar qurduq,
Şeirlər yazdıq.
Gözümüzdən
Nazlı-nazlı düşən yaş
Nə həqiqətlər danışdı bizə.

Üzü sənə sarı uzanan əlim
Yol oldu.
Əllərimin yolu sənin,
Bədənimin solu sənin...




Məktub

Sən də tam ola bilmədin.
Tamamlaya bilmədin,
Ürəyimin yarim qalan hissəsini...

Toxuna bilmədiyi xəyallarını
Gözləriylə qucaqlayan
Qadınlar var yer üzündə.
Müstəmləkə ürəklərin
Məhəbbəti böyük olur.
Böyük sevgiləri də
Böyük ürəklər alır.
Sənin ürəyin balaca,
Məhəbbətin balaca,
Cəsarətin balaca...

Sən də tam ola bilmədin.
Məni sevmək asan deyil!