Azərbaycan Respublikası Kinematoqrafçılar İttifaqı “Zaman və məkan” adlı qısametrajlı sənədli filmlər üçün ssenari müsabiqəsi elan edib.

İttifaqdan bildirilib ki, müsabiqə kinematoqrafiya sahəsində gənclərin yaradıcılıq fəaliyyətini inkişaf etdirmək, gənc və istedadlı müəllifləri aşkara çıxarmaq, həmçinin milli kinomuza yeni fikir, yeni nəfəs gətirmək məqsədilə keçirilir. Müsabiqə həm də digər sahələrdə çalışan gənclərə kino sahəsində özlərini sınamaq imkanı yaratmaq və bununla da mövcud rəqabəti gücləndirmək üçün nəzərdə tutulur.

Müsabiqəyə 20 səhifədən çox olmamaq şərti ilə sənədli filmlər üçün ssenarilər qəbul olunur. Hər müəllif üç ssenaridən artıq təqdim edə bilməz. Yaşı 35-ə qədər olan bütün şəxslər müsabiqədə iştirak edə bilər.

Ssenarilər oktyabrın 31-dək Azərbaycan Respublikası Kinematoqrafçılar İttifaqına (Səməd Vurğun küç. 43 (World Business Center, 16-cı mərtəbə) göndərilməlidir.

Münsiflər heyəti məxfi seçim nəticəsində üç ssenarini qalib elan edəcək. Qalib ssenarilərin müəllifi pul mükafatı və diplomla təltif olunacaq. Birinci, ikinci və üçüncü yerlərə müvafiq olaraq 1500, 1000 və 500 manat veriləcək. Müsabiqənin nəticələri 2017-ci ilin noyabr ayında açıqlanacaq.

Müsabiqəyə informasiya dəstəyi verənlərdən biri də Azərbaycan Dövlət İnformasiya Agentliyidir.