İtaliyanın Pestum şəhərində XXI “Arxeoloji turizm üzrə Aralıq dənizi yarmarkası”nda iştirak edən Mədəniyyət Nazirliyinin nümayəndə heyəti “Əli və Nino” romanının müəllifi hesab olunan Məhəmməd Əsəd bəyin (Qurban Səidin) məzarını ziyarət ediblər.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Zakir Sultanov və nümayəndə heyətinin digər üzvlüləri İtaliyanın Pozitano şəhərində yerləşən məzara baş çəkiblər.

Qeyd edək ki, Məhəmməd Əsəd bəy 1905-ci ildə anadan olub. 1920-ci ildə bolşeviklərin Azərbaycanı işğal edənə qədər ailəsi ilə birgə Bakıda yaşayıb. Bir müddət Almaniya və Avstriyada məskunlaşıb, daha sonra İtaliyaya köçüb. O, 1942-ci ildə İtaliyanın Pozitano şəhərində vəfat edib. Məzarın olduğu yer isə 2017-ci ildə Mədəniyyət Nazirliyinin əməkdaşları tərəfindən müəyyən olunub.

Qurban Səid təxəllüsü ilə əsərlər yazan Məhəmməd Əsəd bəy bizə daha çox “Əli və Nino” roman ilə tanışdır. “Əli və Nino” roman 1937-ci ildə ilk nəşrindən sonra qısa müddət ərzində Avropada populyarlıq qazanıb, 70-ci illərdə isə Amerika oxucuları bu əsərlə tanış olub. Romana marağın yenidən artması isə Azərbaycanın müstəqilliyə qovuşduğu illərə təsadüf edir. İndiyədək roman 30-dan çox dilə tərcümə olunub. Həmçinin Heydər Əliyev Fondunun vitse-prezidenti Leyla Əliyevanın layihə rəhbərliyi və icraçı direktorluğu və “BAFTA” mükafatı sahibi Asif Kapadianın rejissorluğu ilə “Əli və Nino” romanına eyniadlı bədii film çəkilib.