Azərbaycan Respublikası Prezidentinin “Azərbaycan kinematoqrafiyasının inkişafı ilə bağlı bəzi tədbirlər haqqında” Sərəncamının icrasına uyğun olaraq, milli kinematoqrafiya sahəsində fəaliyyət göstərən şəxslərə dəstək olmaq, onların yaradıcılığını stimullaşdırmaq və yeni yaradıcı qüvvələri kinodramaturgiya sahəsinə cəlb etmək üçün Mədəniyyət Nazirliyi tərəfindən elan olunmuş bədii film ssenariləri müsabiqəsinin formatını və miqyasını genişləndirmək, daha çox kinematoqrafçının iştirakını təmin etmək məqsədilə müsabiqədə iştirakla bağlı şərtlərə bəzi əlavələr edilib.

Nazirlikdən AZƏRTAC-a bildirilib ki, müsabiqədə ssenari yaradıcılığı ilə məşğul olan istənilən şəxs iştirak edə bilər və bununla bağlı yaş məhdudiyyəti yoxdur. Müsabiqədə iştirak üçün az büdcəli tammetrajlı bədii, həmçinin uşaq mövzusunda bədii, qısametrajlı bədii, sənədli və animasiya filminin ssenarisi (elektron variantda CD diskdə və çap olunmuş variantda, şrift “Courier New”, ölçü 12), şəxsiyyəti təsdiq edən sənədin surəti və müəllif haqqında məlumatın (əlaqə telefonu və e-mail ünvanı) təqdim edilməsi tələb olunur;

Müsabiqədə iştirak üçün film ssenarisi (və ya ssenariləri) və tələb olunan sənədlər mayın 1-dək (Azərbaycan Dövlət Film Fondunun baş mütəxəssisi və müsabiqənin münsiflər heyətinin məsul katibi Leyla Vəzirzadəyə, ünvan: AZ 1065, Bakı şəhəri, Yasamal rayonu, Moskva prospekti 10) təqdim edilməlidir;

Hər bir müəllif müsabiqəyə vətənpərvərlik, milli-mənəvi və ümumbəşəri dəyərlər, yeniyetmə və gənclər, eləcə də müasir həyatın digər prioritet mövzularında bir və ya bir neçə film ssenarisi təqdim edə bilər.

Müsabiqənin kino mütəxəssislərindən ibarət münsiflər heyətinin rəyi əsasında ən yaxşı ssenarilər müəyyən edilir və münsiflər heyətinin apardığı müzakirələr məxfi saxlanılır.

Qaliblərin adları bu il mayın 20-dək nazirliyin www.mct.gov.az saytında və “Mədəniyyət” qəzetində açıqlanacaq.

Qalib ssenarilərə dövlət sifarişi ilə filmlər çəkiləcək.

Bu reqlamentin tələblərinə cavab verməyən ssenarilərə baxılmır.

Müsabiqəyə təqdim olunan ssenarilər geri qaytarılmır.