“Libraff” kitab mağazası məkanında Osip Mandelştamın yaradıcılığına həsr olunmuş poeziya gecəsi keçirilib. Gecəyə gələn tədbirin qonaqları görkəmli şair, Gümüş əsrinin parlaq nümayəndəsinin şeirlərini oxuyublar. Poeziya gecəsi “İrana Qasımova ilə klassik poeziya” layihəsi çərçivəsində təşkil olunub.

Tədbirin təşkilatçısı və layihənin müəllifi İrana Qasımova bildirib ki, poeziya gecəsində şairlər, oxucular, aktyorlar, mədəniyyət və incəsənət xadimləri çıxış ediblər. Onların arasında Yulya Motorina, Natella Kərimova, Zarema Manafova, İnqa Baxoldina, Səidə Sübhi, Firuz Məmmədov, Leyli Salayeva, Qasım Xəlilov, Arzu Muradova, Dmitri Babintsev də olublar.

Osip Mandelştam XX əsrin rus şairi, esselərin müəllifi, tərcüməçi və ədəbi tənqidçidir. Onun müasir poeziyaya və gələcək nəsillərin yaradıcılığına təsiri o qədər çoxşaxəlidir ki, ədəbiyyatşünaslar indi də bu mövzuda mütəmadi dəyirmi masalar təşkil edirlər.

İrana Qasımova şair, ssenarist, rejissor, Azərbaycan Yazıçılar Birliyinin üzvü, bir neçə poeziya külliyyatının və uğurlu ədəbi layihələrin müəllifidir. “İrana Qasımova ilə klassik poeziya” layihəsi 2019-cu ilin iyunundan bəri həyata keçirilir. Bu layihə çərçivəsində təşkil edilən hər bir tədbir klassik şairlərin birinə həsr olunur. /Azərtac/