Dünən redaksiyamızla əlaqə saxlayan Anar bu müsahibəyə cavab vermək istədiyini söylədi. “Yenə yalan, yenə böhtan” başlıqlı yazılı cavabı olduğu kimi nəzərinizə çatdırırıq.

“Hörməti Sevinc xanım! ”Yeni Müsavat" qəzetində (22-23 dekabr) Sizin bir qadın yazıçıyla apardığınız müsahibəylə tanış oldum. Müsahibə verənin mənim haqqımda söylədiyi ədəbsiz sözlər onun hansı abır-həya sahibi olduğunu əyani şəkildə göstərir. Tərbiyəsizliyə tərbiyəsizliklə cavab vermək istəmirəm. Yalnız müsahibədə yer alan iki ağ yalanı təkzib edirəm. Müsahibə verən iddia edir: “Anar bu günə qədər bizim haqqımızda elə sözlər deyib ki...” Sizin, yəni kimin? Konkret söhbət bu qadından gedirsə, “Yeni Müsavat” qəzetində mənə qarşı son iki hücumuna qədər onun heç bir yazısı heç bir vaxt diqqətimi çəkməyib və təbii ki, onun haqqında heç yerdə heç bir söz də deməmişəm. Heç yerdə onun cürlərinin ünvanına söz dediyimi də göstərə bilməz. Konkret yalanlara, böhtanlara cavab verməli olanda belə heç kəsin adını çəkmirəm. Kim deyilənləri özünə aid edirsə öz işidir. Ümumiyyətlə, hər yetənin adını çəkməyi özümə yaraşdırmıram".

Anar daha sonra G.Mövludun ikinci iddiasına da cavab verib: “Müsahibədə ikinci iftira da yeni deyil. Müsahibə verən iddia edir ki, mən eyni zamanda oğluma və qızıma təqaüd vermişəm. Nə eyni zamanda, nə müxtəlif zamanlarda oğlum və qızım Yazıçılar Birliyindən və ya hər hansı başqa yerdən təqaüd almayıblar və nə qədər mən Yazıçılar Birliyində işləyirəm, almayacaqlar. Bu yalanı vaxtilə başqa birisi də ortaya atmışdı. Təkzib etdik, amma görünür, gərək məhkəməyə müraciət edəydik ki, başqası həvəslənib eyni böhtanı atmayaydı. Bu uydurmaları bir daha təkzib etməyə ona görə məcburam ki, vicdanı olan hər kəs mənə qarşı hücumların 99 faizinin nə sayaq ağ yalanlara, qara böhtanlara, növ-növ iftiralara əsaslandığını görüb agah olsun”. /musavat.com/