Hekayə

    -Nə olar, məni müəllimlə görüşdürün...
    -Olmaz.
    -Çox xahiş eliyirəm... Mən axı...
    -Ə, sən nə sırtıq adamsan! Dedim olmaz!
    -Bilirsən, mən səni  tanıyıram... Sən sədrin bacısı oğlusan! Səni bura qoyub ki, onu mənim kimi şikayətçilərdən qoruyasan... Amma nə eliyirsən, elə, mən bu gün onu görməliyəm. Qarşıdan  Yeni il gəlir. Mənim uşaqlarım acdılar... Mən haqqımı tələb edirəm! Çayxanamı qaytarsın! Yoxsa...
    -Yoxsa, nə, ə?! Nə eliyəssən?! Belə şərəfsiz adam olar!..
    -Mən Qarabağda canımı qoyanda, sən harda sülənirdin, bilmirəm! Mənim şərəfim o torpaqların uğrunda qurban gedib! Bəs sənin şərəfin hanı?!
    Sədrin köməkçisinin yanında duraraq açıq-aşkar ona yaltaqlanan  yaşlı adam ona göz vurur:
    -Bəlkə çıxardıb göstərəsən?
    Əlini qıçının arasına aparır və şaqqa çəkib gülür. Əsəbindən üzü əyilən şikayətçi  bir ayağını çəkə-çəkə çəliyinə söykənib  onların ikisini də  itələyərək içəri keçmək istəyir.
    -Çəkilin, ə! Məni dolayırsınız! Sən öl, sizi elə dolayaram ki...
    Amma şikayətçi  yarımcandır,  müharibənin vurduğu  yara  sağalsa da, onun  fiziki gücünü  almışdır.  İki adam birləşib şikayətçini çölə atırlar.   Bu vaxt iki məktəb yaşlı uşaq şikayəytçiyə yanaşır və  asvalta uzanmış adamın  qolundan tutub ağlayırlar.
    -Ata...
    -Ay ata, dur gedək də, nə olar?
    -Kəsin! Qazinin  balası ağlamaz! Acından ölsəniz də,  ağlamayın bu nakəslərin qabağında! Siz gedin o tərəfə, mən bir də  çalışım görüm, bəlkə girə bildim içəri...
    Bu vaxt  bahalı xarici maşın dayanır, şikəyətçinin  qəbuluna düşmək istədiyi sədr maşından düşür, tələsik  kandardan keçmək istəyir. Şikayətçi özünü onun yoluna atıb qışqırır:
    -Müəllim, mənim balalarım acdır, özüm də müharibədə şikəst olmuşam, bilirsiniz...
    Sədr ona tərs-tərs baxır və qışqırır:
    -Yenə sənsən? Ə, səni mən göndərmişəm müharibəyə?! Sənin çayxananı mən əlindən almışam? Get məhkəməyə müraciət elə... Ə sən nə...
    -Ay müəllim, məni otarma! Sən göstəriş vermisən, hakim də o cür qərar qəbul edib... Bayramqabağı məni qana salma!
    -Nə edəcəksən?! Məni hədəliyirsən!?
    -Yoox, sənə gücüm çatmaz. Eləsəm,  özümə eləyəcəm.
    -Sənin ona qeyrətin çatmaz!
    Sədr çıxıb gedir. Şikayətçi  bayaqkı dartışmada ağrımış  şikəst ayağını  tutub yenə qapıya yaxınlaşır və bu dəfə  nalə təpib qışqşrşr:
    -Bax, budu, sizə deyirəm! Ya bu gün mən sədrin yanına girəcəyəm, ya da...
    “Bacıoğlu”  qapıya çıxıb onun üstünə bağırır:
    -Özünü niyə hayasızlığa qoymusan?! Gördün ki, səni qəbul etmək istəmir! Get məhkəməyə de dərdini!
    Şikayətçi bu dəfə  daha bərkdən bağırır:
    -Elə eləməyin ki, qanımı üstünüzə töküm...
    Bayaqkı yaşlı adam “bacıoğlu”ya göz basıb rişxəndlə deyir:
    -Neyliyək, bu qan salacaq!
    Bacıoğlu ağzın əyir:
    -Pox yeyəcək!
    Şikayətçi onu buradan uzaqlaşdırmaq istəyən polislərə bağırır:
    -Buraxın, yoxsa yandıraram özümü!
    Birinci polis onu itələsə də qorxmuş geri çəkilir, “bacıoğlu”ya baxır:
    -Rəis, bu deyir özümü yandıracam.
    Bacıoğlu:
    -Yox, a? Yalan demir ki?
    Yaşlı adam bu dəfə  elə göz vurur ki, elə bil gözünün qarası itib gedir və açıq lağla deyir:
    -Atam danışırdı  ki, o rayonda  katib olanda biri nefti töküb üstünə və deyib ki, bu saat özümü yandıracam! Kişi deyirdi ki, baxdım gözünün içinə, gördüm bu qorxağın biridir, bundan özünü yandıran çıxmaz. Çıxartdım kibriti verdim, dedim di yandır! Kişi dalı-dalı çəkilib getdi... Ha-ha-ha-haaaaaaa!
    Əvvəl bacıoğlu hırıldadı, sonra polislər də gülüşdülər. Bu vaxt  şikayətçi  qoltuğundan  bir “çubuş” butulkası  çıxardıb  içindəki nefti  başına tökdü və bağırdı:
    -Sizi xəbərdar edirəm, bu dəqiqə  məni içəri burxmasanız, özümü yandıracam! Yaxın gəlməyin, çəkilin, çəkilin deyirəm!
    Bacıoğlu  bahalı siqaretini çıxardıb  damağına qoydu, sonra  gümşü rəngli alışqanla yandırdı, ləzzətlə sümürəndən sonra alışqanı  şikayətçiyə uzatdı:
    -Hadi, yandır görək, necə yandırırsan!
    Nə oldusa bir göz qırpımında oldu. Əvvəl alov, sonra  ütülmüş  baş iyi, sonra  yanıq ət iyi,  alov içində ora-bura qaçan şikayətçinin  və də onun məktəbyaşlı uşaqlarının bağırtısı...
    Bir sutka sonra  şikayətçi dərin yanıq  diaqnozu ilə öldü.  Ölümündən sonra ona... onun ailəsinə  küllü miqdarda pul verildi. Çayxanası ailəsinə qaytarıldı.
    Bir gün sonra  başqa bir nəfər də  özünü yandırmışdı. Sonra daha birisi.
    Səhəri gün  şəhərin mağazalarında  alışqan qalmamışdı.

dekabr 2013

Avanqard.net