“Ulduz” jurnalının noyabr sayı türk xalqları ədəbiyyatından seçmələrə həsr olunub.
 
Jurnal Cavanşir Yusiflinin “Orijinal axtarışında” ekspert yazısı ilə açılır. Cavanşir Yusiflinin jurnal barədə təklifləri, iradları, tənqidi qeydləri oxuculara təqdim olunur. Ekspert yazısının ardınca Xakasiyadan Mariya Okunevanın məsum şəkli boylanır.

Mənim əllərim buz kimi,
Acı istiot və üyüdülmüş qəhvə –
Dodaqlarımda bunlar gizlənib.
Lütfən şeirin sonrasını özünüz oxuyun.

Qırgızıstandan Damira İbragım məşhur qazax yazıçısı Berdibek Sokpakbayevin yaradıcılığından söz açır, onun “Mənim adım Xocadı” hekayəsini incələyir. Uyğur elindən Muhammedcan Raşid “Yaxşılar üçün nəğmələr” oxuyur.

Bolqarıstandan şair, tərcüməçi, araşdırmaçı Əhməd Emin Atasoyun  “Susuzluq” şeiri oxuculara təqdim olunur. Azərbaycandan Oktay Hacımusalı Osman Başın “Xarıbülbül” kitabını vərəqləyərkən keçirdiyi hissləri və duyğuları “Ulduz”un oxucuları ilə bölüşür.  Quzey Kıprısdan Altay Burağan  kiməsə  “Günəş şüasısan” pıçıldayır.

Türkmən elindən Nəsrin Erbil şeirini belə başlayır:

Yaralı quş
Biz də torpağında yetişən
Bir sünbülün dənələri idik.
Sonrasını özünüz oxuyun.

Türkiyədən Demet Çizmelin “Qırmızı göyərçin” hekayəsi, Kosovadan Esad Bayramın “Paradoks” və “Üz” şeirləri jurnalın səhifələrindən boylanir.

Azərbaycandan İlham Rəhimlinin “ Qavramaya qeyri-səlis məntiq işığı” yazısı rəngdə, səsdə – incəsənətdə qeyri-səlis işığının axtarışına həsr olunub.

Türkiyədən Baki Ayhan T.-nın şeirləri, Azərbaycandan Namiq Hacıheydərlinin “Xaqan oğlu Barış bəy” hekayəsi, Türkiyədən Onur Bəhramoğlunun, Şərəf Bilsəlin şeirləri jurnalda yer alır. Özbəkistandan Məhəmmədəli Mahmudovun “Sevgi” hekayəsi, Sanjar Yanışevin şeirləri, Tuvadan  isə Kuular Çertlikoolun şeirləri yeni ovqat yaradır.

Türkmən elindən Bağdad Universitetinin müəllimi Mehmet Omer Kazancı “Şeirin vəzifəsi”ndən danışır. Dost elindən Qoça Qvasalianın “Şeyxin şahini” hekayəsi Cambul Məmmədlinin gürcü dilindən tərcüməsində oxuculara təqdim olunur. Quzey Kıprısdan Arif Ali Albayrakın şeirləri və Şövkət Öznurun  “Kıprıs Türk ədəbiyyatında hekayə” araşdırma yazısı yer alır.  Altay diyarından Tatyana Baymunduzovanın, Makedoniyadan Zeynep Hüseynın, Kosovadan Ağim Rıfat Yeşerenin şeirləri, Quzey Kıprısdan Erdoğan Saracaoğlunun “Polis idarəsinin qarşısında bir adam vardı” hekayəsi, Türkiyədən Mətin Turanın “Yazının inkişafı və cəmiyyətin dəyişimi”  yazısı yer alır. Xakasiyadan Natalya Axpaşeva “Azərbaycan ədəbiyyatını çox sevirəm” – deyə səslənir.
 
Türkiyənin ən maraqlı tərcüməçilərindən biri – Tozan Alkanın şeirlərini, Qırğız yazıçısı Ayderbek Sarmanbetovun “İnqilab” hekayəsini  noyabr sayında oxuya bilərsiniz. “Dərgidə kitab”ın qəhrəmanı şair Qəşəm Nəcəfzadə olsa da, bu sayda onun hekayələrini oxumaq imkanı qazanacaqsınız. “Ulduz”un noyabr sayında şair Səxavət Talıblının dizayn işləri ilə tanış olacaqsınız.

Xatırladaq ki, “Ulduz”un noyabr sayını alan oxuculara Xalq yazıçısı Anarın “Zəfərin mübarək, Nazim!” kitabı hədiyyə olunacaq.