Oktyabrın 1-də "BookZone" Kitab evində şair Hədiyyə Şəfaqətin “Qapı” şeirlər kitabının təqdimat mərasimi keçirilib.

525.az-ın məlumatına görə, "Kitabsevərlər" qrupunun təşkil etdiyi tədbirdə oxucularla yanaşı, ədəbiyyatçılar, eləcə də media nümayəndələri iştirak ediblər.

Qonaqlar arasında ədəbiyyatşünas Rəhim Əliyev, yazıçılar Şərif Ağayar, Aslan Quliyev, Yaşar Bünyad, Pərviz Cəbrayıl, şairlər Zahid Sarıtorpaq, Ramilə Qardaşxanqızı və başqaları çıxış edərək müəllif və onun yaradıcılığı haqqında düşüncələrini bölüşüb, müasir Azərbaycan ədəbiyyatı haqqında fikir mübadiləsi aparıblar.

Daha sonra Hədiyyə Şəfaqət oxucularıyla söhbətləşib, kitablarını imzalayıb, "Qapı" kitabında yer alan şeirlərindən bir neçəsini səsləndirib.

Qeyd edək ki, Hədiyyə Şəfaqətin bir müddət öncə işıq üzü görən “Qapı” kitabına müəllifin son dövrlərdə yazdığı və oxucular tərəfindən sevilən şeirləri yer alıb. /525.az/