Rasim Qaraca - Ra günəş deməkdir, Rasim...
18.02.19
Ey söyüd ağacı salxımların bənzəyir saçlarına bir gözəlin, ancaq boş ver bunu, sən özün ol - qışda soyunan, yazda geyinən bu halınla sən onlardan daha gözəlsən... * gözlərin torlaşsa bir gün duzlu sularla dolan balaca bir gölməçəyə dönsə... Bir təsəllin var yalnız bu mənzərəni üzünə vuran yağmur damlaları tamamlayacaq... * dostlar, bir az da kölgənizi kimsənin kölgəsinə qarışdırmadan yaşayın nə olar *
Pəncərə önündə udumlayıb çayımı nə yerə baxıram, nə göyə baxıram qonmağa yer axtaran o quşa Bilirəm qonmaq üçün deyildi bu qanad çalmalar, sadəcə başlnğıc idi yeni bir uçuşa... * Səninçün yazıram bu şeiri nə əruzda nə hecadadı səni necə düşünürəmsə sevgilim, bax o da eləcədi * Bir əlçim külək olmaq istəyir adam əsmək bir ömür boyu vıyıldamaq heç vaxt yıxılmayacaq kimi görünən bu dünyaya bir az yuxarıdan baxaraq * Sevmək, elə sevmək ki, yer üzündə ikimiz qalmışıq kimi görünək... * Min illərdir döyülən bu qadın deyin, necə güclü olmasın? * İndi sənin olmadığın bu yerlərdə qaranlıq q yağmur y dəniz sadəcə d-dir * Sinop virajlarında avtobus uçuruma yuvarlanacaq bəlkə də yuvarlandı artıq iki sevgili öpüşərək keçir bu qorxunc yolu... və gözlərini açanda nə görsələr yaxşıdır, qanad açmış avtobus uçur buludların arasında * Yaxınlaşıb soruşmaq istəyirəm adını soyuqda büzüşüb dilənən bu qadının axı sən anasan, sevgilisən ayaqlarının altındadır cənnət, yox, mən o deyiləm, 20 manat idim, indisə son 20 qəpiyəm... * Eh, nə deyim axı, məni boşluq deyil, bozluq qorxudur... * Soyuq tər içində ayılıb yuxudan gecənin bir aləmində divardakı rəsm əsərinə baxıram yalnız qara kvadrat görürəm nə baş verdiyini anlamadan. küt bir ağrıyla dərk edirəm indi Maleviçi * Qazax-Ağstafa yolunda sarı çiçək tarlasında qarşısına keçib onun fotosunu çəkmək istəyən bu insana fınxıraraq baxan atın gözlərində həm sarı çiçək tarlası əks olunub həm də əlində əcaib makina tutmuş bu insan * Yola düşüb gedirsən corabsız ayaqqabı geymənin verdiyi azadlıq havası var başında üçtəkər arabasında qarşına çıxan balaca oğlanın üzündəki xoşbəxt təbəssüm də güc verir sənə... Eh, məgər bir yol tapmazmı insan geriyə dönməyəcəyini bildiyi zaman... * Ra günəş deməkdir, Rasim, məgər bu yetərli deyilmi o kor yarasalara...
|
