*
Tapdadı içimi atlı qarışqa,
tapmadı içimi adlı qarışqa-
Qağayı burnutək duzlaşıb içim.

Göylərə yaraşır elə göy adı...
Mənim şeirlərim elegiyadı,
mənim şeirlərim başsağlığıdı.

Öldü,sevə-sevə barama qurdu-
bəxtəvər başına baramaqurdu,
bəxtəvər başına-hazır evin var.

Göynədir qafamı buz kimi sürgün...
Adsız şairləri qabaqda bir gün
atsız yəhərlərin günü gözləyir.


*
...Gecənin məhrəm üzünə
gün olan bilir mən kiməm.
...baxdığı güzgülər göynən
tən olan bilir mən kiməm.

...biləndə göy enib...gedən,
əyninə geyinib gedən,
özündən geniyib gedən-
gen olan bilir mən kiməm.

...bilməyənlər atam, bilməz!
Fəryadam mən, dadam...bilməz.
...mən kiməm hər adam bilməz,
mən olan bilir mən kiməm.


*
Mən kiməm- sorsalar dedim:
sözün zatından gəlirəm.
...mərtəbə-mərtəbə qalxdım-
yeddi qatından gəlirəm.

..hər gələn səsə çıxıram,
quru nəfəsə çıxıram.
...mən bir gün misə çıxıram,
bir gün altundan gəlirəm!.

...dərvişəm, şaham, vəliyəm-
mən könüllərə valiyəm.
...göyün üstündən halıyam,
yerin altından gəlirəm.

...ruhum canımnan pəsdədi,
ruhumu candan istədim.
...yada dost dedim, dost dedim!
Dostun yadından gəlirəm.

Paşam söylər nə söyləsin?
Yaxa dartsın can teyləsin...
Haqqın özü haqq eyləsin,
haqqın adından gəlirəm.


*
Həm aşiqəm, həm dərvişəm...-
mən bir gülün butasıyam.
...mən özümün zamanımda
ötələrin ötəsiyəm.

...qaradan, ağdan gəlmişəm,
bir ulu dağdan gəlmişəm.
...mən enib haqdan gəlmişəm,
dönüb haqda itəsiyəm.

Mən həm məndə həm haqdayam...
...qələmdəyəm, varaqdayam.
...mən özümdən qabaqdayam,
mən özümü ötəsiyəm.

Mən bir canam...birimmi var?
...məndə ölüm-dirimmi var?
Mənim ayrı yerimmi var?
Könüllərdə bitəsiyəm.

Mən dünyaya bildim gəldim...
Gəlişim min ildi...gəldim!
...bir gün olur gəldim, gəldim,
bir gün olur gedəsiyəm.

Rusiya, Volqoqrad şəhəri