Anar Məcidzadə - Canına dərd düşsün, ayrılıq salan
30.11.23
Özünü qoru
Başına döndüyüm, gözəlsən yaman, Gözünə göz dəyər, gözünü qoru. İnciyib küsərsən bircə sözümdən, Xətrinə söz dəyər, özünü qoru.
Sən oldun ömrümün gülü, baharı, Aşiqin əyilməz eşqi, vüqarı. Məhəbbət ocaqdır, söndürmə barı, Sevginin odunu, közünü qoru.
Vuruldum qəlbinə, özünə sənin, Ulduzlar bənzəyir gözünə sənin, Çoxları güləcək üzünə sənin, Üzsüz adamlardan üzünü qoru.
Biz ayrılmazdıq
Biz ki ayrılmazdıq bir-birimizdən, Canına dərd düşsün, ayrılıq salan. Bir sabah yuxudan durub görəydim, Biz ayrılmamışıq, ayrılıq yalan.
Eşqim sonsuz dərya, dünya qədərdir, Mənim məhəbbətim tükənməz, inan. Mən səni nə qədər sevirəm, gülüm, Səni sevilməkçün doğubdur anan.
Hər gün tellərinə sığal çəkəydim, Nə hicran, nə kədər, nə qəm olaydı. Həyatda məhəbbət, bir də səadət, Bizə ömür boyu həmdəm olaydı.
Mən səni sevəcəm
Mən səni sevirəm qoca dünyada, Sevgimə şahiddir qoca dünya da. Sənə olan eşqim, pak məhəbbətim, Hər şeydən ucadır, uca, dünyada.
Mən səni görməsəm bircə gün əgər, Göylər də başını yerlərə əyər. Sənin gülüşlərin, xoş təbəssümün, Əzizim, həyatda hər şeyə dəyər.
Məhəbbət bu imiş gülüm, sən demə, Gah sevinc, gah da qəm axıb sinəmə. Gah qəlbim qanadlı quşa çevrilib, Gah da ki, gözlərim dönübdür nəmə.
Hərdən dözülməyən əzabım oldun, Əzaba dözməyə sən tabım oldun. Bütün sözlərimin tək ünvanı sən, Sevgidən yazılan kitabım oldun.
Mən səni sevəcəm nə qədər varam, Sevməsəm, bu sevgi qoy olsun haram. Səni unutmadım bircə an belə, Sevgilim, heç zaman mən unutmaram.
Şamaxı
Səndən gəlir əslim, soyum, Baba yurdum sən, Şamaxı. Çal-çağırım, nəğməm, toyum, Üzü gülən, şən Şamaxı.
Güllərin saçın yolmaya, Bir çiçəyin də solmaya, Başın üstə kaş olmaya, Nə duman, nə çən, Şamaxı.
İgidlərin yol aldığı, Nəsiminin doğulduğu, Seyidlərin yurd olduğu, Ocaq, pirə tən Şamaxı.
Tarixin, keçmişin qədim, Sən ey müqəddəs məbədim, Mənim əzəlim, əbədim, Anara Vətən Şamaxı.
|
